Mikabat sa syete porsyento (7%) ang pagtaas sa kaso sa Human Immunodeficiency Virus (HIV) sa probinsya sa Southern Leyte karong tuiga, base sa pinakabag-ong HIV/AIDS Surveillance Monitoring Dashboard gikan sa Provincial Epidemiology and Surveillance Unit (PESU).

Sa pakighinabi kang HIV Provincial Coordinator Keisha Elezze Batalon, adunay 15 ka mga bag-ong kaso nga narekord sa lalawigan, as of February ning tuiga, mas taas kumpara sa 199 ka kaso nga narekord niadtong Enero – Agosto miaging tuig.

Kini nagdala sa kinatibuk-ang ihap sa HIV cases sa probinsya ngadto sa 214, diin 18 niini ang nakabsan sa kinabuhi tungod sa komplikasyon sa maong sakit.

Nasayran nga sa maong ihap, kadaghanan sa mga kaso mga lalaki nga nag-edad 21 hangtod 40 anyos. Ang labing batan-ong kaso sa HIV sa probinsya mao ang usa ka bata nga wala pa mag-edad usa ka tuig. Nasuta nga nakuha niya ang maong sakit gikan sa iyang inahan pinaagi sa pagpasuso.

Base sa datus, ang dakbayan sa Maasin ang may labing daghang kaso nga misaka na sa 55, gisundan sa lungsod sa Sogod nga adunay 25, samtang ang Hinunangan adunay 15 ka kaso. Mi-rekord usab ang Bontoc og 14 ka kaso, Malitbog-13, Macrohon-12, Liloan-11, Anahawan-10, St Bernard-7, Tomas Oppus-7, Padre Burgos-7, Libagon-6, San Juan-6, San Ricardo-5, Silago-5, Hinundayan-5, San Francisco-4 og Limasawa-2.

Gibutyag usab ni Batalon nga ang nag-una og common nga pamaagi sa pagkaylap sa HIV mao ang pakighilawas nga walay proteksyon.

Nanawagan si Batalon sa publiko, ilabi na sa mga sexually active nga magpahigayon og voluntary HIV testing ug magpakat-on sa husto nga impormasyon bahin sa HIV aron malikayan ang kahadlok ug diskriminasyon.

| Balita ni Dahlia Orit, RP Sogod