Agig hingpit nga pagsuporta sa sektor sa edukasyon, malampusong giturn-ver sa Rotary Club of Maasin ang usa ka Deep Well Water System, usa ka proyekto sa Water Supply, atol mismo sa pagsugod sa Brigada Eskwela niaging Hunyo 9, ning tuiga.

Ang nakadawat nga benepisyaryo sa maong proyekto mao ang Cabulihan Elementary School, sa dakbayan sa Maasin.

Matud pa nga ang maong proyekto dako og gikatabang sa mga magtutudlo ug estudyante sa eskwelahan, ilabina sa aspeto sa SBM WINS (School-Based Management – Water, Sanitation, and Hygiene in Schools) diin ang Cabulihan Elementary School nakab-ot na ang Level 3, timaan nga tibuok na ang ilang implementasyon sa limpyo ug luwas nga tubig, sanitasyon, ug kahinlo sa palibot.

Matud pa sa Rotary Club of Maasin City, ang ilang tinguha mao ang padayon nga pagserbisyo ug pagpalambo sa mga komunidad pinaagi sa mga proyekto nga may dakong epekto sa kinabuhi sa mga tawo.

Nunot sa maong kalambuan, nagpaabot sab sa iyang pasalamat si City Mayor Nacional Mercado sa maong grupo nga naghatag pagpakabana sa mga tinun-an og kalimpyo sa komunidad.