
MAASIN CITY (PIA) – Usa ka dakung kalihokan nga magtanyag og mga libreng serbisyo gikan sa mga nagkadaiyang nasudnong mga buhatan sa gobyerno ngadto sa mga katawhan ang gikatakdang ipahigayon dinhi sa atong siyudad sa Maasin.
Kini mao ang Bagong Pilipinas Serbisyo Fair (BPSF), proyekto nga gipasiugdahan sa gobyerno pinangunahan ni Pangulong Ferdinand Marcos, Jr. ug hugot nga gitambayayongan ni House Speaker Martin Romualdez, Tingog Partylist, ug sa Southern Leyte provincial government dinhi sa ato.
Sumala pa sa bag-ong provincial administrator, Engr Nelson Tan, kinsa mao usab ang provincial engineer, ipahigayon ang BPSF anha sa gym sa Tomas Oppus Oppus Pilot School, barangay Mantahan, sa adlawng Biyernes, Agosto 2.
Nasayran nga ang payout alang sa TUPAD program sa DOLE anha pagahimoon sa TOPS gym, samtang ang ubang mga national government agencies anha magpahigayon sa ilang serbisyo sa duol nga mga classrooms.
Sa gihimong coordination meeting kagahapon didto sa buhatan ni Vice Gov. Rosa Emilia Mercado nga gidumala ni Engr. Tan, Lyra Destriza, staff ni Speaker Romuadez, ug Jacky Maceda, BPSF So. Leyte coordinator, miabot nag 14 ka mga nasudnong ahensiya ang kompermadong magtanyag sa ilang libreng serbisyo.
Kini naglakip sa mga opisina sa DOLE, TESDA, PNP, DOH, NBI, PSA, GSIS, DTI, Public Attorney’s Office (PAO), PhilHealth, DICT, LTO, Comelec, ug SSS, samtang ang mga local nga sakop sa prensa, ang Associated Media of Southern Leyte (AMSL), uban sa Philippine Information Agency (PIA), moduyog alang sa halapad nga coverage sa maong kalihokan.
Giawhag sab ang mga sakop sa AMSL, ingon man mga Information Officers sa NGAs ug LGUs, pag-apil sa virtual press conference inig ka Agosto 1, alas 2 sa hapon, nga mag-gunad sa Tacloban City.
Giklaro sa mga tigpasiugda nga ang BPSF usa ka rehiyonal nga kalihokan alang sa mga molupyo sa Eastern Visayas, ug kini gituyo aron gyod pagpaduol sa serbisyo ngadto sa mga tawo.
Sentro sa BPSF-Eastern Visayas mao ang Tacloban City, apan ang unom ka mga probinsiya sa rehiyon dungan usab ug hiniusa nga magpahigayon sa samang kalihokan, hinungdan nga mini BPSF na ang tawag sa paghimo niini sa mga probinsiya sa Northern Samar, Eastern Samar, Samar, Biliran, Leyte, ug Southern Leyte.
Subay niini, giawhag ang mga tawong dunay katuyoan sa mga ahensiyang gihisgutan sa pag-adto sa TOPS karong adlawng Biyerness, Agosto 2, gunad alas 8 sa buntag, aron matagad ang ilang panginahanglan, ug makapahimulos sa libre nga serbisyo.
(Reports from: Marcelo Pedalino; Photo Credit: Loloy Salazar)