Gikumpirma sa lokal nga kagamhanan sa Sogod, Southern Leyte nga aduna nay kumpirmadong kaso sa Monkeypox kon Mpox sa lungsod.

Matud kang Municipal Mayor Shefered Lino Tan, dili angay magpanic ang katawhan, hinuon gi-awhag niya ang tanan sa kinatibuk-ang suporta og kooperasyon sa mga healthcare workers.

Giasoy sa mayor nga ang lokal nga kagamhanan magmugna og taskforce aron maoy manguna sa pag kontrol batok sa pagkuyanap sa maong sakit.

Nasayran nga ang pasyente niadtong pang Mayo nagpakita og sintomas. Gipaklaro ni Municipal Health Officer Dra Isabelita Mato nga naabtan og duha ka semana ang confirmatory result sanglit gipadala pa ang swab sample ngadto sa Research Institute for Tropical Medicine (RITM). 

Gibutyag sa mga health officials nga sukad nag-manifest og sintomas, gi-isolate na ang pasyente og gisugdan nag monitor og ingon man contact tracing sa iyang pamilya.

Matud sa Rural Health Unit (RHU-Sogod), ang kumpirmadong kaso usa ka 28 years old nga residente sa brgy Zone 2, Sogod, Southern Leyte.

Gipaklaro sa opisyal nga kasamtangan ng naka-recover ang pasyente ug walay angay ika-alarma ang katawhan sanglit na-manage ra ang mga sintomas niini og dali nga naka-isolate ang pasyente.

Sa laing bahin, gisaysay ni Provincial Health Officer Dr Feliciano John Matibag nga base sa ilang gimugna nga meeting niaging semana, aduna nay gigahin nga pondo ang provincial government alang sa pakigbatok sa maong sakit. 

Gipasabot ni Matibag nga adunay giandam nga tambal ang PLGU og nagpadayon ang surveillance sa tibuok lalawigan ilabi na sa lungsod sa Sogod.

Samtang, gi-awhag sab ni Dra. Mato ang mga pribadong hospital sa pagpasabot dayon sa ilang opisina inkaso adunay ma-monitor nga adunay susamang sintomas sa mpox aron organisado og adunay sistema ang ilang reporting.