Pinasubay sa pag obserba sa Pride Month karong buwan sa Hunyo, ang Ajonay Pride, usa ka grupo sa LGBTQIA+ sa dakbayan sa Maasin, madasigon sa ilang kampanya alang sa pagpalanog sa mga angayang masayran kalabot sa Human Immunodeficiency Virus (HIV) ilabi na sa sektor sa mga kabatan-onan sa syudad.

Sa pakighinabi kang Ajonay President Glen Cutamora, aduna nay gisumite ang ilang grupo sa lokal nga kagamhanan para makipaglambigit sa mga skwelahan og barangay alang sa mga sex education programs, uban ang suporta sa City Health Unit (CHU).

Matud kang Cutamora, gipunting ang kabatan-onan isip prayoridad sa ilang kampanya tungod sa padayon nga pagsaka sa kaso sa HIV dili lamang sa lalawigan, kundi sa  tibuok Pilipinas.

Gilauman sa grupo nga pinaagi sa edukasyon ug husto nga impormasyon, malikayan ang pagkatap sa sakit ug mapalambo ang kahimsog sa pangisip ug panglawas sa kabatan-onan.

Gipasabot usab ni Cutamora nga nangita sila og alternatibong pamaagi ug suporta aron mapadayon ang kampanya, lakip na ang pagduol sa mga non-government organizations, eskwelahan, ug barangay councils aron matukod ang mas lapad nga koalisyon batok sa HIV ug alang sa youth empowerment.