MAASIN CITY — Aduna na puhon dugang kapili-an ang mga tinun-an sa Southern Leyte human giduso karon sa Southern Leyte State University kon SLSU Maasin Campus ang planong pagdugang sa ilang mga akademikong kurso o programa.
Sa gipahigayong Stakeholder’s Forum kagahapong adlawa, Distembre 6, adlawng Biyernes, lakip sa mga giproponer nga kurso mao ang Bachelor of Science in Information Systems (BSIS) ug Bachelor of Entrpreneurship (BS Entrep).
𝘽𝙎 𝙄𝙣𝙛𝙤𝙧𝙢𝙖𝙩𝙞𝙤𝙣 𝙎𝙮𝙨𝙩𝙚𝙢
Matud pa ni Rannie Sumacot, kinsa maoy proponent sa BSIS nga programa, kini usa ka programa nga nagtuon sa importansya sa teknolohiya alang sa negosyo ug organisasyon.
“Lahi sa BS Information Technology, ang kurso magtutok sa pagmugna ug mga software systems, pag analisar ug paggamit sa datus aron mas mapalambo ang mga negosyo,” asoy sa opisyal.
Gipahayag sa SLSU nga ang BSIS magatubag sa nagkadako nga panginahanglan alang sa mga teknikal nga kahanas, ilabi na sa mga industriya nga nagdepende sa teknolohiya.
Gane, sa gipahigayon nilang survey nga gilangkuban sa 1,200 ka mga senior high nga estudyante sa 16 ka mga skwelahan sa Maasin City og mga silingang lungsod, dako ang porsyento nga nagpakita sa ilang interes sa maong programa.
𝘽𝙎 𝙀𝙣𝙩𝙧𝙚𝙥𝙧𝙚𝙣𝙚𝙪𝙧𝙨𝙝𝙞𝙥
Sa ikaduhang kurso nga maong ang BS Entrep, gihimug-atan ni Juvenal Sumaya, ang proponent sa maong programa, nga ang kurso magtabang sa mga tinun-an paghimo ug paglambo sa ilang kaugalingong negosyo.
Nasayran nga tungod ang duha ka mga kurso maoy prayoridad nga mga programa karong mga panahona, libre ang tuition fee, miscellaneous ug bisan ang mga laboratory nga gastuonon niini.
𝙋𝙖𝙣𝙜𝙡𝙖𝙣𝙩𝙖𝙬 𝙨𝙖 𝙎𝙇𝙎𝙐
Gitarget nga ilunsad ang mga programa sa first semester sa academic school year 2025-2026.
Mukabat sa 4.1 milyon pesos ang gigahing budget sa SLSU-Maasin alang sa paghanjag sa maong kurso diin 2.4M pesos niini sa BSIS samtang 1.7M sa BS Entrep.
Hinuon anaa usa sa 35 ka mga tinun-an ang ilang inisyal nga dawaton sa matag naasoyng kurso.
Gipasalig usab ni SLSU President Dr. Jude Duarte nga ang mga kursong ihanjag sa publiko nahisubay sa panginahanglan sa industriya.
Hugtanon sab niyang gisiguro nga dekalidad ang mga kurso nga itanyag sa maong skwelahan ubos sa iyang pagdumala.
Gikataho nga sa dili pa iabli ang kurso sa usa ka unibersidad, gikinahanglan nga muagi sa makuting proseso sama sa approval sa Board of Regents, nahisubay sa Ched Memorandum Order, ug uban pa.