Gatusan ka mga residente ang nakabenepisyo sa gipahigayong TrucKabataan Medical Mission kagahapong adlawa, Nobyembre 22, sa brgy Lower Villa Jacinta, Macrohon, Southern Leyte.

Ang “TrucKabataan” usa ka programa sa Department of Health (DOH), katambayayong ang lokal nga kagamhanan sa probinsya ug lungsod, nga nagtanyag og nagkadaiyang serbisyo medikal alang sa mga katawhan sa komunidad.

Ang TrucKabataan— Adolescent-Friendly Mobile Health Facility nagahatag og mga libreng serbisyo sama sa general health assessment; laboratory ug basic diagnostic tests sama sa CBC, Urinalysis ug Blood Typing; dental services partikular ang pag-ibot sa daot nga ngipon; Family Planning; Ultrasound, pre-natal ug postnatal care; Sexual reproductive health; Nutrition services, Mental Counseling ug uban pa.

Matud pa kang PCL President Ina Marie Loy, kinsa maoy usa sa nanguna sa kalihukan, ang maong programa gidesenyo aron mas mapadali ang pag-access sa serbisyo medikal ilabi na sa mga kabatan-onan nga nanginahanglan ug espesyal nga pagtagad.

Sumala sa mga opisyal, kapin usa ka gatus ka indibidwal ang midangop ug nakapahimulos sa nagkadaiyang serbisyo atol sa paglunsad niini kagahapon.

Ang mga residente nagpahayag sa ilang pagpasalamat sa programa tungod kay kini usa ka dako nga tabang aron masiguro ang maayong panglawas sa komunidad.