Tungod sa nagkataas nga kaso ug hagit sa mga kabatan-onan kalabot sa sekswal nga butang, ang gobyerno nag-awhag karon sa publiko sa pag-edukar sa sektor sa kabataan.

Niana, ang Rural Health Unit (RHU)-Padre Burgos, nagmugna og mipahigayon og serye sa symposium nga gitawag og “Healthy Young Ones” nga gisalmotan sa mga Grade 11 ug 12 nga tinun-an sa Padre Burgos National Technical Vocational High School ug mga Grade 10 nga estudyante sa St. James College of Padre Burgos, So. Leyte Inc.

Matud pa sa tigpamaba sa RHU nga si Ms. Keisha Elezze Batalon, ang symposium usa sa ilang kampanya nga nagpunting sa adolescent sexual ug reproductive health.

Tumong niini ang paghatag edukasyon sa mga kabatan-onan kalabot sa ilang kaugalingon, responsibilidad og importansya sa maayong panglawas ilabi na sa sexual health.

Lakip sa mga gituki mao ang Sexual Health and Orientation, Gender Identity and Expression (SOGIE), Puberty, Reproductive System, Sexually Transmitted Infections (STIs) ug HIV/AIDS.

Nanguna sa maong activity mao si Municipal Health Officer Dr. Fretzie Tomimbang ug Nurse II og Municipal Population Officer Designate Ma’am Maria Aina Daclan, sa suporta sa mga administrador sa eskwelahan nga sila si Hon. Ricardo E. Borces og Rosalio Imboc, ingon man ni Provincial HIV/AIDS Coordinator Joewil Napuli.

Gilauman nga pinaagi sa maong symposium, dili na mag duha-duha sa pagduol ang mga kabatan-onan ngadto sa mga healthcare workers kalabot sa isyu sa ilang pagtubo isip mga daga og ulitawo.