Maayong balita! Nahuman na ang paghuwat.

Anaa sa 67 ka mga Southern Leyteños ang libreng nakadawat ug anteyohos kon prescription glasses gikan sa Salvacion Oppus Yniguez Memorial Provincial Hospital kon SOYMPH, pinaagi sa abag sa Department of Health kon DOH.

Sa pakighinabi kang SOYMPH Medical Center Chief Ionne Castillones, mukabat sa hapit 10 milyones ang gi-alokar nga pondo alang sa mga libreng kibido.

Nasayran nga ang mga benepisyaryo mao kadtong naka-avail sa gitanyag nga libreng Prescription Glasses niadtong Oktubre 11 karong tuiga.

Gawas niana, gibutyag sab sa opisyal nga nagmalampuson ang ilang gihimong cataract mission dili pa lamang dugay, diin anaa sa kapin kon kulang 150 ka mga pasyente ang libreng nakapahimulos sa atong probinsya.

Angayang masayran nga ang libreng cataract mission nagmabungahan tungod sa suporta sa probinsyal nga kagamhanan ug sa tabang sa mga medical doctors gikan sa DOH, Eastern Visayas Medical Center, Tau Omega Mu Fraternity and the Lady Circle, Eye Hear Foundation Inc., Medilight Incorporated ug uban pang mga stakeholders.

Gihimug-atan ni Castillones nga tumong sa probinsyal nga hospital mao ang paghatag ug accessible eye care services sa publiko pinaagi sa pagbalik sa ilang panan-aw, paglikay sa pagkabuta ingon man pag promotar ug awareness sa katawhan.