Anaa tanan sa 16 ka mga local government units kon LGU sa Southern Leyte ang napiling awardee sa prestihiyosong Seal of Good Local Governance kon SGLG alang karong tuiga 2024.

Sa bag-o lang gipagawas nga pahayag sa Department of Interior and Local Government (DILG), 14 ka mga municipal government units ang malampusong nakab-ot ang maong award, lakip na ang City Government of Maasin ug Provincial Government of Southern Leyte.

Ang mga munisipyo nga naka angkon sa pasidungog mao ang lungsod sa: Bontoc, Hinunangan, Hinundayan, Libagon, Liloan, Macrohon, Malitbog, Padre Burgos, Pintuyan, San Juan, Silago, Sogod, St Bernard, ug Tomas Oppus.

Unang nasayran nga ang SGLG usa ka award gihatag sa mga LGUs nga miabot sa taas nga pamatasan sa maayo nga pamalaod ug epektibong pagserbisyo alang sa ilang mga komunidad.

Ang SGLG award nagpasabot nga ang mga LGUs sa Southern Leyte nakasunod sa mga standards sa paghatag og kalidad nga serbisyo sa mga nasudnong prayoridad sama sa disaster preparedness, transparency, responsableng paggamit sa pondo, kalimpyo ug kaluwasan sa komunidad, edukasyon, panglawas, ug malungtarong mga programa.