Daw tabla’y nakadawat ug Christmas bonus ang mga napiling benepisyaryo sa ayudang pinansyal gikan sa probinsyal nga kagamhanan, ubos sa Project MIAN nga programa.

Matud pa kang Vice Governor Rosa Emilia “Milai” Mercado, anaa sa 3.5 milyon pesos ang gigahing pondo alang sa 2,357 ka mga Maasnhons, diin matag usa kanila nakadawat ug tag 1,500 pesos.

Gikasayran nga gipangunahan ang maong payout sa mga dagkong lideres sa atong lalawigan ug syudad niadtong Nobyembre 13-14, niaging semana sa dakbayan sa Maasin.

Matud pa ni Mercado nga ang mga benepisaryo nag gikan sa 20 ka mga barangay sama sa Panan-awan, Bilibol, Guadalupe, Cabulihan, Tawid, Sto Rosario, Manhilo, Bactul 1 ug Bactul 2, Libhu, Lunas, Badiang, Baugo, Cansirong, Acasia, Gawisan, Tam-is, Lanao, Mahayahay ug Lib-og.

Ang Project MIAN gimugna aron paghatag tabang o pinansyal nga suporta ngadto sa mga Southern Leytenong anaa sa lisud ang kahimang.

Gipaklaro sab sa opisyal nga ang tanang benepisyaryo miagi sa makuting assessment pinaagi sa usa ka prosesong gilangkuban sa mga focal person sa syudad ug sa probinsya.

Awhag niya nga tarongon sa pag gasto ang kwarta aron mapahimuslan sa pamilya.

Nagpaabot sa iyang pasalamat si Mercado ngadto sa TINGOG partylist sa paghatag ug pondo sa maong kalihukan.