Nagmalampuson ang duha-ka-adlaw nga orientation kabahin sa Basic Gender and Development (GAD) Concepts ug SOGIESC (Sexual Orientation, Gender Identity and Expression, and Sex Characteristics) niadtong Nobyembre 14-15, 2024, sa Provincial Senior Citizens Building, Asuncion, Maasin City.

Nasayran nga ang maong kalihukan usa ka dakong oportunidad alang sa mga partisipante nga palawmon ang ilang pagsabot sa GAD ug mapaayo ang inklusibidad nga komunidad.

Ang programa naglakip sa halapad nga diskusyon bahin sa GAD-related nga mga impormasyon, nga gisugdan pinaagi sa pagpasabot sa mga legal nga mandato ug basihanan sa GAD. Gisentro niini ang mga balaod ug polisiya nga nagsuporta sa gender equality ug nagpanalipod batok sa diskriminasyon. Ang mga partisipante usab mituki sa mga nag-unang tema sa pagkatawo ug ang komunidad, diin gipalapdan ang pagsabot kung giunsa paghulma sa gender roles ug norms ang personal nga kasinatian ug dinamika sa katilingban.

Sa maong kalihukan, nagtambong sila si Mrs. Cristita A. Clava, ang Provincial GAD Focal Person, Provincial Administrator Engr. Nelson G. Tan, mga GAD staff, ug mga miyembro sa LGBTQIA+ community.

Sumala ni Mrs. Clava, “Ang maong kalihukan nagpalig-on sa paningkamot sa paghimo og mas inklusibo ug patas nga komunidad. Kini magpadasig sa atong mga stakeholders nga magtinabangay alang sa usa ka mas makatarunganon nga katilingban.”

Gilauman nga pinaagi sa maong orientation, mas mailhon ug mapasabot ang papel sa gender equality ug mapausbaw ang kalambuan sa probinsya, nga gilaumang maghatag ug maayong benepisyo alang sa tanang lungsuranon.