Aduna nay 44 ka mga kabataan ang atua na karon sa nasud sa Taiwan sukad pa sa bulan sa Agosto karong tuiga, nag-eskuyla na sila sa mga tunghaan didto ubos sa 3 + 4 vocational education program sa maong nasud, kini sumala pa ni Myra Rentuza, provincial board member sa Distrito 2 ning lalawigan.

Sa taho ni Marcelo Pedalino sa PIA Southern Leyte. Atol sa Kapihan, si Rentuza mitahu nga sa 44 ka mga estudyante, 15 kanila ang taga Silago, 6 taga Hinunangan, 16 taga Saint Bernard, 1 taga Liloan, ug 6 ang taga Maasin City.

Gipasabot ni Rentuza nga ang 3 + 4 vocational education program for overseas compatriot students maglangkob kini sa tulo ka tuig pagtuon sa senior vocational high school nga full scholarship on tuition fee, diin matag semester tulo ka bulan ang pag-eskuyla ug tulo ka bulan ang OJT nga aduna nay suweldo hangtud mahuman ang tulo ka tuig sa napiliang vocational course.

Human sa tulo ka tuig nga senior high didto sa ilang sistema sa Taiwan, mahimong mopadayon og upat ka tuig nga kurso sa college, mahimo sab nga gamiton na ang nakat-onan pag-pang-aplay og trabaho sa ubang mga nasud o mobalik dinhi sa Pilipinas.

Giasoy niya nga may usa niya ka higala ang mi-contact kaniya mahitungod ning maong kalambuan, ug tuod man, bulan sa Disyembre sa miaging tuig nagsugod na siya kuyog ang giporma niya nga team paglibot sa probinsiya, sa mga kabukirang barangay sa lain-laing kalungsoran, pagsabwag sa kasayuran.

Tuod man dihay 300 kapin ang nangaplay, diin 124 ang ning-qualify, apan 44 ra gyod ang hingpit nga nakalarga, first batch kini dinhi sa ato sa region 8 diin ang So.Leyte lang ang nakapadala, apan second batch na sa Pilipinas.

Sa miaging bulan, Okture, personal nga gibisita ni Rentuza ang tulo ka mga estudyante didto sa Taiwan aron pagsuta sa ilang pagka-butang ug tuod man hapsay ang ilang kahimtang.

Padayong nag-awhag si Rentuza nga dugang pa untang mga estudyante makapahimus ning maong okasyon, gani kagahapon gikatakda siyang moadto sa Tambis National High School sa St. Bernard alang sa samang katuyoan.

Ang qualifications naglakip sa edad,16-22 anyos, o natawo gikan Enero 1,2003 ngadto sa Disyembre31, 2009, nakatapos sa Junior High School nga 85% ang general average nga grado, himsog ang panglawas, ug kinahanglan motambong sa Mandarin class labing menos 240 ka oras.

Alang sa mga interesado, sa dugang detalye, mahimo nga moadto lang sa iyang buhatan sa Sangguniang Panlalawigan office sa kapitolyo.