Isip pagsaulog sa Deaf Awareness Week, ang buhatan sa Department of Education kon DEPED Maasin City Division, katambayayong ang Maasin City National High School ug Maasin City Sped Center, nagpasiugda ug kalihukan aron matagaan ug gimbug-aton ang inklusibong edukasyon ug komunidad.

Matud pa kang Teacher Francina Gonzalez Nantes, lakip sa ilang gihimo mao ang pagpakusog sa awareness sa katawhan pinaagi sa pagbitay ug mga streamers sa pampublikong lugar ug pagpahigayon ug symposium nga may kalabutan sa “ Navigating Social Media for Better You and Community” nga gisakmutan sa mga tinun-ang adunay espesyal nga panginahanglan.

Tumong sa symposium mao ang pagpunting sa responsibilidad sa pag gamit sa social media ug giunsa kini aron magpakusog sa plataporma alang sa mga kabataan.

Ang Deaf Awareness Week, nga gisaulog karong semanaha, naghatag og higayon sa tanan nga magpahayag sa suporta alang sa inklusibo ug patas nga oportunidad alang sa tanang magtutungha, ilabi na sa mga adunay laing panghinahanglan.