Anaa sa pito ka mga linemen, uban ang usa ka Technical Manager nga si Engr Melvin Cadao, ang gipadala sa Southern Leyte Electric Cooperative kon SOLECO ngadto sa Catanduanes aron motabang sa pagpabalik sa ilang kuryente ngadto nga naapektuhan sa paghapak sa Super Typhoon Pepito.

Matod ni Mark Obligado, ang acting General Manager sa kooperatiba, gawas sa mga linemen, nagpadala usab ang SOLECO og mga pick-up ug boom trucks, ingon man mga maintenance vehicles.

Saysay niya, kini nga lakang kabahin sa pagpakita sa Bayanihan spirit ug suporta sa mga kaigsoonan nga naa sa ubang rehiyon.

Dugang sa kooperatiba, kini ang panahon nga mabalik nato ang tabang nga ilang gihatag sa panahong kita gikuso-kuso ni Super Typhoon Odette niadtong tuig 2021.

Sa send-off ceremony, gipasalamatan ni Obligado ang dedikasyon sa mga linemen nga andam mutrabaho bisan sa mga hagit ug kapeligro.

Nanawagan usab ang SOLECO sa publiko nga mag-ampo alang sa kaluwasan sa mga linemen sa ilang pagtuman sa ilang misyon ug pagpakita og suporta sa mga naapektuhan sa Super Typhoon Pepito.

Nasayran nga anaa sa 86 ka mga linemen gikan sa nagkadaiyang electric cooperative sa Eastern Visayas ang nagkahiusa aron paghatod og tabang sa mga lugar nga wala pay kuryente tungod sa kadaot sa bagyo.