Human sa hapit 5 ka buwan gikan sa pag-abli ug pag inagura sa labing unang provincial Multi-Specie Marine Fish Hatchery sa lalawigan, aktibo na kini nga nagtrabaho aron mapadaghan ang mga marine species sa maong pasilidad.

Gawas sa Bangus, Ketong, Pompano ug uban pang nagkadaiyang isda, aduna sab karon gidusong proyekto ang kagamhanan aron mapadaghan ang produksyon sa Blue Swimming Crab kon mas naila nga “Lambay”.

Ang pasilidad bag-o lang mipahibalo nga ang unang batch sa mga lambay hapit na moabot sa yugto sa pagpangitlog. 

Matud pa sa update sa provincial government of Southern Leyte, ang mga lambay nagpakita na og gray nga kolor, nga timaan nga mosulod na kini sa 1-2 ka adlaw nga pagpanganak. Kini usa ka dakong lakang sa paningkamot sa hatchery nga magpataas sa produksyon ug pagbuhi’g mga lambay sa lokalidad.

Tumong sa maong inisyatiba ang paagdaghan sa populasyon sa mga lambay aron makab-ot ang igong supply sa pagkaon ug resources sa lalawigan.

Una ng nasayran nga ang multi-specie marine fish hatchery nga anaa nahimutang sa brgy San Roque, Macrohon, Southern Leyte, maoy labing unang fish hatchery sa entiro Rehiyon 8 nga gipanag-iya sa probinsya, katambayayong ang teknikal nga suporta sa Bureau of Fisheries and Aquatic Resources kon BFAR.