Mukabat sa 57 kilos sa gituohang shabu, nga gibana-banang nagkantidad of 387.6 milyon pesos, ang malampusong nasakmit sa mga tinugyanan sa balaod sa dihang nagpahigayon kini ug operasyon sa Liloan Ferry Terminal, sa brgy San Roque, Liloan, Southern Leyte, pasado ala 1:50 sa kadlawn, niadtong Byernes, Nobyembre 8, 2024.

Sa pakighinabi sa lokal nga media kang PDEA So Leyte Provincial Officer Christine Anne Dumapias, giasoy niini nga ang mga kontrabando nadiskubre sulod sa usa ka sakyanan, sa tabang sa Narcotic Detection Dog, atol sa ilang pag-inspeksyon sa mga bag-ong niabot gikan sa Surigao sakay sa usa ka fast craft.

“Yung sasakyan ay galing po sa Surigao. Maganda na mayroon na tayong Seaport Interdiction Unit sa Southern Leyte na nakabase sa Liloan, (which just started last June 2024.) So nag conduct kami ng regular K9 inspection,” matud ni Dumapias sa usa ka live radio interview.

Atol sa inspeksyon nga gipangunahan sa PDEA, kaabag ang Liloan Municipal Police Station, Maritime Police, Philippine Ports Authority, Philippine Coast Guard, ug Southern Leyte Provincial Police Office, ilang nasayran nga nagpakita ug positibong senyales ang K9 nga iro sa usa ka abandonadong Montero Sport color gray nga sakyanan.

Didto nakita sa mga opisyal ang tulo ka dagkong bag nga adunay gidudahang illegal nga droga nga gisulod sa usa ka compartment.

Sa pinakauwahing report, nasubay na ang rehistradong tag iya sa sakyanan taga Carmen, Surigao del Sur, base sa bill of lading niini.

Padayon karon ang follow up operation aron masakpan ang lokasyon sa drayber sa sakyanan.

Sa laing bahin, mapasalamaton si SLPPO Provincial Director PCol Hector Enage sa composite interdiction team sa pagpakgang nga makasulod ang dakong kantidad nga kontrabando sa lalawigan.