MAASIN CITY – Usa ka skateboard park nga nagkantidad og PHP5 milyon ang bag-o lang giablihan sa publiko sa dakbayan sa Maasin, probinsya sa Southern Leyte.

Base sa taho sa Department of Public Works and Highways kon DPWH Southern Leyte 1st district engineering office, ang konstruksyon sa skateboard park nagsugod niadtong Marso 2024 gamit ang pondo gikan sa 2024 General Appropriations Act nga gipatuman sa ilang opisina. Ang proyekto naglakip sa excavation, embankment, concrete and reinforcing steel bars, masonry, painting works, railings, ug storm drainage system. 

“Ang pagtukod sa skateboard park nagserbisyo isip usa ka lugar para sa kabatan-onan ug usa ka tigumanan alang sa mga skater. Naghatag kini ug luwas nga lugar alang sa mga skater aron mapalambo ang ilang mga abilidad, masuhid ang mga bag-ong tricks, ug maipakita ang ilang talagsaong estilo nga makatampo sa personal nga pagtubo ug artistikong ekspresyon. Ang parke mahimong makatabang sa lokal nga ekonomiya pinaagi sa pagdani sa mga bisita ug pag-host og mga events ug kompetisyon,” ingon ni District Engineer Manolo A. Rojas.

Nahimutang sa Capitol Grounds sa Barangay Asuncion, ang skateboard park gi-inaugurar niadtong Oktubre 19, 2024 uban sa presensya sa mga empleyado sa DPWH, lokal nga mga opisyal, ug mga mahiligon sa skateboarding. (Press Release)