Libhu, Maasin City – Gipalig-on sa Department of Science and Technology (DOST) ang ilang pakigtambayayong sa nagkalain-laing mga ahensya sa gobyerno, lokal nga kagamhanan ingon man ang mga pribadong grupo, ug mga institusyon sa akademya aron mapadali ang pagpatuman sa iStart (Innovation, Science, and Technology for Accelerating Regional Transformation) program sa Southern Leyte.

Ang maong multi-sektoral nga panagiusa nagtinguha sa pagpalambo sa lalawigan pinaagi sa paggamit sa siyensya, teknolohiya, ug inobasyon (STI).

Matud pa kang DOST Provincial S&T Director Dr. Ramil Uy atol sa presconference kauban ang lokal nga media, ang iStart usa ka inisyatibo nga pundasyon sa DOST nga nagtuon sa paghimo og mga makabag-o ug modernong solusyon nga base sa siyensya, teknolohiya, ug inobasyon aron masulbad ang lokal nga mga hagit sa nagkadaiyang sektor sa komunidad.

Lakip sa mga gitutokan karon sa DOST ang epektibong pamaagi aron mapalambo ang matang sa Disaster Risk Reduction Management (DRRM) sa atong probinsya panahon sa katalagman, makabag-ong teknolohiya alang sa waste management system, digitalization ug connectivity nga adunay dakong epekto sa edukasyon sa mga kabataan ug uban pa.

Ang tulo ka adlaw nga planning workshop series sa DOST nga gipahigayon sa Libhu Hill Resort niaging Oktubre 22-24, giduyogan sa mga beteranong speakers gikan sa University of the Philippines (UP) Los Baños nga sila si Edgar Reyes Jr., Kyle Pierre Israel, ug Kristina Cordero-Bailey, nga pulos mga associate professors ug adunay igong kaalam nga gipahat sa mga partisipante.

Agi’g paghatag suporta sa ahensya, mipasalig si SP Member Mikhael Leonardo Mercado, kinsa maoy Chairman sa Committee on Information and Communication Technology, nga ang LGU Maasin padayong nagtinguha og dugang mga ICT nga programa ug proyekto alang sa sustenable ug modernong syudad sa Maasin.

Nagpaabot sab sa iyang dakong pasalamat si PPDC OIC sa Binky Vasquez sa tanang madisigong nakig-kolaborar sa maong kalihukan.