Malaumon ug taas nga ambisyon ang gipunting karon sa gobyerno human ang buhatan sa Department of Information and Communication (DICT) Southern Leyte aktibo nga nakigkolaborar sa usa ka sugyot nga dalhon ang sektor sa Business Process Outsourcing kon BPO o mas giilang call center companies sa lalawigan isip kabahin sa inisyatiba aron madasig ang lokal nga ekonomiya.
Atol sa Kapihan sa PIA niadtong Oktubre 15, Martes sa buntag, gituki ni DICT Provincial Officer Marian Go-Soco, uban sa iyang team, ang mga nag unang programa ug serbisyo nga gitanyag sa ilang opisina, ingon man ang nagpadayon nga mga proyekto sa pakigtambayayong sa ilang mga partner stakeholders.
Sa pamulong ni Go-Soco, iyang gidasig ang lokal nga kagamhanan sa Maasin sa paghimo ug Information Communication Technology (ICT) Council aron maghatag ug direksyon sa mga estratehiya sa pagpalambo sa aksisibilidad pinaagi sa automation ug digital approaches.
Matod ni Go-Soco, ang ilang buhatan anaa sa proseso sa paghatag ug padayon nga suporta sa local government unit o LGU- Maasin, pinaagi ni konsehal Mikhael “Mikee” Mercado, aron matuman ang maong proyekto.
“Tan-awa ang Bacolod, Iloilo ug Campetic sa Palo, daw kabuti ang mga negosyo nga nagsulpot tungod sa tabang sa ICT Councils . Mao usab kana ang gusto namo nga mahitabo dinhi. Thankfully, si Konsehal Mikee is with us,” matod ni Go-Soco dihang iyang gipasiugda ang kalambuan sa ubang mga probinsiya tungod sa paglungtad sa ICT Councils nga moresulta unya sa pagmugna og mga call center companies.
Libre nga Public Wifi
Gibutyag usab sa DICT nga aduna silay 23 ka natukod nga free wifi locations sa tibuok Southern Leyte.
“Apil na niini ang mga pampublikong lugar sama sa mga terminal, eskwelahan, libraries, ug bisan sa mga barangay,” matod sa Information System Analyst II Cosme Socito Jr ug Engr Jesryl Vergara.
Lakip sa mga benepisyaryo sa lungsod sa libreng public wifi mao ang Malitbog, Liloan, San Ricardo, Pintuyan, San Juan, Bontoc, Anahawan, Hinunangan, HInundayan, Tomas Oppus, Padre Burgos, San Francisco, Sogod, Silago, ug uban pa.