
MAASIN CITY — Wala’y daganan nga pwesto sa umaabot mid-term eleksyon si kasamtangan mayor sa dakbayan sa Maasin nga si Nacional “Nikko” Mercado, human opisyal nga gi-withdraw ang iyang kandidatura kagahapong adlawa, Oktubre 9.
Matud pa sa Commission on Election kon COMELEC Maasin, pasado alas 2:43 sa palis kagahapon, personal nga mipasa si Mercado sa iyang statement of withdrawal ngadto sa ilang opisina.
Nasayran nga si Mercado nihabol sa pagsang-at sa iyang Certificate of Candidacy kon COC niadtong Oktubre 8, atol gyud sa katapusang adlaw sa filing, diin buot unta niyang mudagan pagka konsehal sa syudad.
Hinuon, wala na gibutyag ang rason sa maong withdrawal. Si Mercado anaa na karon sa ikatulong ug katapusang termino isip mayor sa dakbayan.
Sa laing bahin, gipaklaro sa COMELEC nga wala nay gitugot ang ilang opisina nga substitution due to withdrawal, apan mamahimo gihapong maka-withdraw ang bisan kinsang kandidato sa ilang kandidatura, kon ugaling mautro ang ilang huna-huna.
Gitugot lamang ang substitution kon ang rason tungod sa kamatayon ug pagka disqualify sa kandidato, basta ang substitute candidate adunay samang apliyedo ug sakop sa samang nominating party sa pulihan niini.