
MAASIN CITY – Hingpit na nga nangandam ang Commission on Election (COMELEC) alang sa pagdawat sa mga desididong magduso sa ilang Certificate of Candidacy o COC alang sa eleksyon sunod tuig.
Ang filing sa COC gikatakda karong Oktubre 1 hangtud 8, 2024 lakip ang adlawang Sabado ug Dominggo, kini matud pa nila ni Provincial Election Supervisor Atty. Antonio Gulay ug Maasin City Election Officer Atty. Don Joshua Margate, kinsa maoy mga pinasidunggang bisita sa Kapihan sa PIA kagahapong adlawa.
Saysay sa mga opisyal, lakip sa gikinahanglang timan-an sa mga “aspirants” nga mudagan mao ang musunod:
- LIMA (5) ka kopya sa duly-accomplished Certificate of Candidacy. Ang pag print back to back sa legal bondpaper (ang COC form mamahimong ma download sa www.comelec.gov.ph)
- Gikinahanglan nga adunay notaryo ang matag kopya. Pwede ang notary public o administering officer.
*Gi-abisohan nga duot ang notaryal nga selyo sa matag kopya sa COC para walay problema sa pag submit ngadto sa COMELEC law department. - Sa mga adunay partido, lakip sa e-attach ang duly-signed ug notarized nga Certificate of Nomination and Acceptance (CONA).
*Siguradoha nga ang authorized signatory sa partido ang nipirma sa CONA, kon dili, makonsidera kini nga walay partido kon independente. - Pag attach sa latest passport size ID picture.
- Dili laktawan ang matag blanko. Ug dili applicable butangan ug “N/A”.
- One stage name o nickname laman ang gitugot sa COMELEC.
- Ang pag file mamahimong personal o pinaagi sa otorisadong representante.
- Mamahimong mag attach sa bio-data or program of government. (optional)
- Kinahanglan adunay documentary stamp ang original o unang page. (Ang docstamp nagkantidad bali’g 30 pesos.)
- Siguradoha nga pirmado ang matag form (Gi-abisohan ang pag gamit ug blue nga tinta o ballpen)
Striktong gi-abiso sa COMELEC nga dili nila dawaton kung dili kompleto ang mga dokumento.
Gipaklaro usab sa mga opisyal nga dili pasabot nga ilang gidawat sa ilang lebel sa opisina, wala nay posibleng kakulian, kay ang tanang dokumento ipailawm sa makuting pag-review sa kaulohan.
𝙎𝙪𝙗𝙨𝙩𝙞𝙩𝙪𝙩𝙞𝙤𝙣
Si Atty. Gulay nagkanayon nga wala nay gitugot nga substitution due to withdrawal human sa katapusang adlaw sa COC filing o sa Oktubre 8.
Samtang, kon ang rason tungod sa kamatayon o pagka-disqualify sa kandidato, mamahimo kining pulihan basta ang substitute candidate adunay samang apilyedo ug sakop sa samang partido sa politika.
“𝘼𝙮𝙖𝙬 𝙥𝙖𝙜𝙝𝙪𝙬𝙖𝙩 𝙨𝙖 𝙙𝙚𝙖𝙙𝙡𝙞𝙣𝙚”
Samtang, napulo (10) na lang ka adlaw ang nahabilin alang sa mga nagtinguha nga magparehistro ug makaapil sa Mayo 2025 nasyonal ug lokal nga eleksyon.
Padayon karon nga nanawagan ang buhatan sa Commission on Elections (Comelec)-Provincial ug City, sa pagbisita sa ilang opisina ug dili na maghuwat sa deadline sa voter’s registration karong Setyembre 30, 2024.
“The deadline says September 30, 2024 walay abiso nga adunay extension, so kutob ra diha atong pagdawat ug rehistro sa botante,” matud ni Atty. Gulay.
“So as early as now, we are encouraging the public nga magparehistro na, ug dili huwaton ang deadline, kay abli man atong opisina even on holidays and Saturdays, from 8am to 5pm,” dugang saysay ni City Election Officer Atty Don Joshua Margate.
𝙏𝙤𝙩𝙖𝙡 𝙍𝙚𝙜𝙞𝙨𝙩𝙚𝙧𝙚𝙙 𝙫𝙤𝙩𝙚𝙧𝙨
Sukad gisugdan sa COMELEC ang voter’s registration period, ang lalawigan adunay nay 292,067 ka mga rehistradong botante as of July 15 karong tuiga.
Sa habig sa city COMELEC, ang buhatan nakarecord og 54,887 total registered voters, diin 2,352 kabuok ang mga bag-ong aplikante, kansa resulta sa pagpaningkamot sa ahensya sa pagpahigayon ug satellite registration sa mga lagyong dapit sa lokalidad, ingon man ang pag-awhag og mga walk-in applicants.