MAASIN CITY — Gilaumang sa tunga-tunga sa tuig 2025, usa ka komersyal center ang muusbaw sa syudad sa Maasin aron paghatag ug bag-ong oportunidad ug dugang kapili-an sa mga tawo, ilabi na sa ilang mga pagpamalit sa ilang kinahanglanon.

Gipasiugda sa Banyan Ventures Incorporated kauban ang lokal nga kagamhanan sa syudad ang groundbreaking ceremony sa Maasin Commercial Center karong adlawa, Setyembre 18, sa Terminal Area, brgy Tagnipa, Maasin City.

Mismong ang Chief Operations Officer (COO) Ruben Santos sa Banyan Ventures ang nangunay sa pagdu-aw sa maong lokasyon, inubanan ni Governor Damian Mercado, City Mayor Nacional Mercado, mga konsehal ug department heads sa City hall, aron pangunahan ang maong kalihukan.

Matud pa kang Santos, anaa sa tunga sa hektarya kon 5,000 square meters, ang planong itukod nga one-storey commercial center nga gituohang magdala ug lain-laing branded ug sikat nga tindahan ug kan-anan.

Dugang pa sa opisyal, bisan pa sa mga bag-ong nanglungtad nga mga establisemento sa lokalidad, ang ilang negosyo wala magtan-aw sa kompetisyon kundi ang pakig-“complement” sa ubang mga dagkong tindahan aron adunay dugang kapili-an ug mas maayong kasinatian ang mga konsumante. 

“Walay monopolyo sa Maasin” – Mayor Nikko

Sa samang higayon, gipaklaro usab ni City Mayor Nacional “Nikko” Mercado nga ang pag usbaw sa mga dagkong tindahan sa Maasin nagpasabot nga walay monopolyo sa negosyo sa syudad, taliwa sa mga alegasyon sa uban.

Sumala sa mayor, walay basehan ang mga pasangil nga gipugngan sa lokal nga kagamhanan ang pagsulod sa mga tigpatigayon, gane ila pang gi-aghat ang pag-abli sa pultahan sa mga mamuhunan nga buot magnegosyo sa lokalidad.

“With this new businesses arising in our city, this only means that our market is open. Wala gi-monopolize. Infact, we encourage investors to put up their business here in Maasin,” si Mercado nagkanayon atol sa gipahigayong pressconference kauban ang lokal nga media.

Gawas sa Maasin Commercial Center, aduna sab dugang kalambuan ang lauman sa publiko sa Maasin City Plaza Bldg (dapit sa area sa Bo’s Coffee) diin aduna sab laing potensyal nga negosyante ang magbubo sa ilang puhunan.

Kahinumduman nga aduna sab anunsyo si Mercado sa iyang official social media account nga adunay bag-ong convenience store ug gasolinahan ang itukod sa brgy Mantahan.

Si Mercado mipaambit nga ang pagtukod sa mga bag-ong negosyo usa ka pamaagi aron mapalambo ang ekonomiya sa syudad ug maghatag og dugang oportunidad sa trabaho alang sa mga residente.