CAMP ALFREDO BANTUG – Minilyon ka pesos ang balor sa mga bag-ong kalibre sa armas ug mga sakyanan ang giturn-over sa Police Regional Office 8 ngadto sa Southern Leyte Provincial Police Office (SLPPO) ug ubang piniling municipal police stations (MPS) sa lalawigan.

Gipangunahan ang pagpang apod-apod sa mga kahimanan ni Police Brigadier General Reynaldo Pawid, kauban si Rhom Armel Frias, ang Chief of Staff ni Sec. Sonny Angara sa PRO-8 Grandstand, Camp Ruperto Kangleon, Palo, Leyte kagahapong adlawa, Setyembre 16.

Matud pa kang PLTCol Mark Nalda, ang tigpamaba sa kwerpo sa kapulisan, ang mga nadawat nilang kahimanan kabahin sa programa sa PNP aron pagsangkap sa kapulisan sa mga saktong gamit aron mapalawig ang kampanya alang sa kalinaw sa probinsya pinaagi sa ilang makanunayong presensya sa komunidad, ingon man ang mapadali nga pagresponde sa mga kirminal nga kalihukan o kakuli-an.

Sa pamahayag sa SLPPO, ang lalawigan nakadawat ug 20 kabuok 5.56mm Basic Assault Rifle (Galil) nga iturnover sa nagkadaiyang city/municipal police stations; upat ka mga Light Motorycle 150cc Dirt Bike para sa mga kalungsuran sa Anahawan, Liloan, Pintuyan, ug San Juan; ug usa ka 4×4 Isuzu D-max alang sa San Francisco MPS.

Lakip sa nidawat sa mga kahimanan mao sila si NUP Rusell Capahi, PCol Elizar Gonzaga, ug ang mayor sa LGU San Francisco nga si Hon. Bene Tiaozon.

Sa pikas bahin, gipasidan-an ni Provincial Director PCol Hector Enage ang mga sakop sa kapulisan nga ayuhon kini sa paggamit ug dili ipasagad ang mga kahimanang nadawat.

Sa kinatibuk-an, anaa sa dul-an 23 milyones ang kantidad sa tanang armas, sakyanan ug uban pang ekipo ang nadawat sa PRO-8 gikan sa PNP Headquarters.