Patay ang usa ka lalaki, samtang 3 ang anaa karon sa tambalanan human kini gikatahong nakuryentehan sa kable sa kuryente pasado alas 3 sa hapon karong adlawng Sabado, Setyembre 14 sa brgy Bulawan, Pintuyan, Southern Leyte.

Matud pa sa pakighinabi kang Pintuyan MDRRMO Evandee Ramos, si alyas Ben (biktima) ug iyang usa ka kauban, padulong na uli gikan trabaho sa dihang milabay sila sa maong lugar gamit ang ilang tagsa ka motorsiklo. Nasabtan sa mga biktima nga adunay natumba nga lubi nga miigo sa linya sa kuryente hinungdan nga nilay-lay ang koneksyon niini ug nagbabag sa kalsada.

Base sa mga residente nga nakakita, gi-alsa sa biktima ang ilang duha ka motor.

“Sa unang pag-alsa, malampuson nilang natabok ang usa ka motor sanglit brownout man kadto. Sa dihang ila ng alsahon ang usa ka nahibiling motor, didto naatlan ang pagsiga balik sa kuryente hinungdan nga nakuryentehan kini, lakip na ang mga nitabang nila nga mga residente,” saysay ni Ramos.

Si alyas Ben gideklarang dead on arrival samtang ang 3 dali nga gidala sa Pintuyan District Hospital tungod sa mga samad.

Gipa-amping karon ang publiko nga magbinantayon sanglit nakasinati ang probinsya ug kusog nga hangin ug may mga pag-uwan-uwan tungod sa epekto sa Habagat.

(Photo credits: Rico Amper)