𝐀𝐠𝐨𝐬𝐭𝐨 13, 2024– Ang atong Local Health Board uban sa City Disaster Risk Reduction and Management (CDRRM) Council nagpatigayon og emerhensyang miting karong hapon aron ipatuman ang mga lakang batok sa nagkataas nga kaso sa dengue sa Maasin City.

Gideklara sa board ang 𝙎𝙏𝘼𝙏𝙀 𝙊𝙁 𝘾𝘼𝙇𝘼𝙈𝙄𝙏𝙔 tungod sa seryosong hulga alang sa katawhan tungod sa dala sa dengue outbreak.

Sumala ni Dr. Francilisa Tan, ang City Health Officer II, ang pinakabag-o nga datos nagpakita og kritikal nga pagtaas sa mga kaso sa dengue sa atong siyudad. Kini nga mga positibong kaso naghatag og dakong kahingawa sa lokal nga pangagamhanan ug sa katawhan.

Tungod niini, nanghinaot si Mayor Nacional Mercado nga magtinabangay ang tanan sa kampanya batok sa dengue pinaagi sa pagpraktis sa “5S Laban sa Dengue.”

“Atong hugtan ang atong kampanya batok sa dengue pinaagi sa paglimpyo sa atong palibot. Pangitaon ug gub-on ang mga breeding sites sa lamok aron mapugngan ang dengue,” pahayag ni Mayor Mercado.

Giawhag usab sa mayor ang publiko nga magpakonsulta sa ilang mga healthcare providers ug magpa-Rapid Diagnostic Test sa Urban Health Center kung makasinati og hilanat o uban pang simtomas sa dengue sama sa kalit nga pagtaas sa temperatura nga mogahin og 2 hangtod 7 ka adlaw, uban sa duha o labaw pang mga simtomas sama sa sakit sa ulo, kaluya sa lawas, sakit sa mga kalawasan ug kasikas, sakit sa likod sa mata, kawad-on og gana, pagsuka, diarrhea, ug mga rashes sa panit. Libre kini nga serbisyo para sa tanang katawhan.

“Padayon ta sa pagtinabangay aron malampasan nato kini nga krisis,” dugang pa ni Mayor Mercado.

Maghiusa kita aron maprotektahan ang atong mga pamilya ug komunidad batok sa peligro nga dala sa dengue.

(Press Release)