Katulu-on ug pilo ang ihap sa pagsaka sa kaso sa dengue ang narekord sa entiro Southern Leyte gunad buwan sa Enero hangtud karong buwan sa Hulyo kon ikomparar sa nilabay nga tuig sa susamang mga buwan.

Sa pakighinabi kang Disease Surveillance Officer Joewil Napuli, anaa na sa 820 ka mga kaso sa dengue ang narekord sa lalawigan karong tuiga, mas taas ug 649 o 358 porsyento kon itandi sa 171 ka mga kaso sa niaging tuig.

Matud pa sa opisyal, pinakadaghang narekord mao ang dakbayan sa Maasin nga adunay 346 ka mga kaso; gisundan sa lungsod sa Macrohon nga may 205 ka mga kaso.

Samtang, 41 kabuok kaso sa Padre Burgos, Bontoc 37; Hinunangan 32;  Sogod 27; Malitbog 21; Tomas Oppus 17; Saint Bernard 16; Liloan 16; Silago 13; Libagon 13; Limasawa 12; San Francisco 6; Pintuyan 5; Anahawan 5; San Juan 3; Hinundayan ug duha kabuok sa San Ricardo.

Gipasabot sa opisyal nga ang uban hingpit ng nakarecover ug walay nareport nga adunay nakabsan sa kinabuhi tungod sa maong sakit.

Gipklaro sab ni Napuli nga wala’y outbreak sa lalawigan apan adunay mga lungsod ang hingpit nga gitutokan aron mapugngan ang pagsaka sa kaso.

“So far wala paman tay outbreak if provincial level, pero naa tay municipalities nga gibantayan kay consistent ang pagtaas sa cases,” matud ni Napuli.

Kasagaran sa mga nataptan ang mga menor de edad nga bata nga nag edad 5-14 anyos.

Lakip sa mga sintomas sa dengue mao ang taas nga hilanat, pagsuka, labad sa ulo, pagsakit sa tibuok lawas, rashes kon pantal-pantal ug diarrhea.

Awhag sa opisyal nga gikinahanglan ang kanunay nga paglimpyo sa palibot ug likayan ang pagpundo ug tubig nga mahimong maitlogan sa lamok nga nagdala og dengue.