MAASIN CITY — Duol na sa tinuod ang paningkamot nga mahimo ng Tourism Zone ang probinsya sa Southern Leyte, human nagmalampuson ang plenary session sa Senado niaging Myerkules, Hunyo 4.

Gi-aprubahan sa Senado ang ikaduhang pagbasa sa House Bill No. 5598 o “An Act Declaring the Province of Southern Leyte a Tourism Zone”, kansang balaodnon giduso ni 1st district Congresswoman Luz Mercado, og gi-sponsoran ni Senador Mark Villar.

Ang maong balaodnon nagtinguha nga mapausbaw ang turismo sa probinsya pinaagi sa pagpasiugda sa mga hiyas sa kinaiyahan ug kabilin sa kultura sa lalawigan, partikular sa mga kalungsuran sa Padre Burgos, Malitbog og sa dakbayan sa Maasin.

Sa pakighinabi kang Congresswoman Luz Mercado, siya malaumon nga ang maong balaodnon maghatag og dakong oportunidad sa lalawigan nga molambo.

“Pinaagi sa lig-on nga suporta sa turismo, mahimong mas daghan ang mga mamuhunan nga muanhi aron magtukod og negosyo, maghimo og kabag-ohan ug magpalambo sa lokal nga ekonomiya,” asoy sa kongresista.

Angayang masayran nga kon madeklara na ang probinsya isip Tourism Zone, mahimo na kining eligible sa pondo sa national government ingon man makadawat og technical support sa mga tourism-related nga mga proyekto.

Dugang saysay sa opisyal nga ang maong lakang makatabang aron mailhan ang Southern Leyte isip usa ka lahi nga lalawigan, nga dili lang mailhan ingon nga kabahin sa “Leyte,” apan usa ka probinsyang adunay kagaulingong kaanyag og potensyal.

Malaumon si Mercado nga ang maong balaodnon mapasar sa katapusang pagbasa og mahimong hingpit nga balaod sa nasud.

| Balita ni Dahlia Orit