Devolution transition plans sa mga LGUs sa So. Leyte nagpadayon na, DILG mitaho

so.leyte

Sugod sa pagka Agosto 20, ang tanang mga local government units sa probinsiya nagpahigayon na sa ilang mga devolution transition plans (DTPs).

Usa kini ka proseso nga gikinahanglan isip pagpangandam inig ipatuman na ang Mandanas-Garcia ruling gunad sa sunod tuig, 2022.

Si Jhonel Anavesa sa DILG provincial office mitahu diha sa kapihan sa PIA interbyu kaniya nga sa kinatibuk-an 269 na sa 500 ka mga barangay ang naka-finalize na o kaha anaa na sa pag-final sa ilang tagsa-tagsa ka DTPs.

Dunay upat sa 18 ka munisipyo ang naka-kompleto na sa ilang formulation workshops, samtang ang mga lungsod sa Saint Bernard ug Libagon hingpit nang nakatapos sa ilang formulation workshops sa municipal ug barangay levels, ug anaa na kini sila karon sa proseso sa finalization o kaha adoption, nagkanayon si Anavesa.

DILG gitahasan pagtabang sa mga LGUs pagpatuman sa Supreme Court decision

Sa samang kalambuan, ang buhatan sa DILG misiguro nga ma-plastar na ang tanang mga plano sa mga LGUs para sa pag-aksyon sa hukom sa kinatas-ang hukmanan.

Ang Mandanas-Garcia nga desisyon sa Supreme Court nagmando nga ang mga LGUs na maoy mosagubang sa pipila ka mga serbisyo gikan sa pipila usab ka mga national government agencies, nunot sa paghatag niini og tukma nga pundo nga gikuha dili lang sa mga buhis nga nahipos sa BIR kondi hasta na sa uban pang mga revenue-generating agencies, usa na ang Bureau of Customs.

Lakip sa mga national line agencies kansang tipik sa mga serbisyo niini hingpit nang maadto sa mga LGUs mao ang DSWD, DA, DOH, DOLE, DPWH, DepEd, DOT, ug NIA.Gihimo sa DILG ang mga DTP trainings ug workshops aron maandam ang mga LGUs, diin ang mga barangay dunay panahon nga 60 ka adlaw alang sa ilang DTPs, 90 ka adlaw ang sa mga siyudad ug mga munisipyo, ug 120 ka adlaw ang para sa mga lalawigan, tahu pa ni Anavesa.

Usbaw, us-us sa pahat sa mga LGUs angay pangandaman

Ang hukom sa Supreme Court nagtakda og tulo ka tuig nga transition plan para sa inanay nga pagsagop sa mga gipang-devolve nga mga serbisyo, diin ang tuig 2022 maoy una sa sunod-sunod nga tulo ka tuig.

Niining tuiga, 2022, gidahum nga mosaka ang dawatonon nga mga IRA sa mga LGUs balig 27%, ug kinahanglan gamiton kini sa inantigo nga paagi unsay unahon pagbutang og mga tawo nga maoy moatiman sa ma-devolve nga serbisyo.

Apan sa tuig 2023, ang share sa IRA — nga tawagon na unya og national tax allocation (NTA) — gilauman nga mokunhod sanglit ang tuig nga pagabasehan mao ang 2020, tuig nga daghang mga negosyo ang nanira gumikan sa mga pagdili nga gipahamtang mugna sa covid pandemic.

Hinuon, inig abot unya nianang panahona, naka-plastar na ang mga LGUs sa ilang mga priorities ug napangandaman na ang pagmenos sa dawatonon nga pahat sa NTA, ug sa samang higayon nakaplastada na sab ang ilang resource mobilization strategy, matud pa ni Anavesa.

(Reports from Marcelo Pedalino /PIA Southern Leyte)

About Dahlia Orit 325 Articles
Your journalist/blogger from Maasin City

Be the first to comment

Leave a Reply

Your email address will not be published.


*